رحمتلیک خسروشاهلی بنایی شاعریمیزدن ایکی قطعه شعر
خان عمی
بو زمانه منیم احوالیمی قاتدی خان‌عمی!
گون‌به‌ءگون وئردی فشار یاخشی قوجالتدی خان‌عمی!
بو آز عمروم ده زمانه ائله‌دی خسته منی
سالدی تئز حوصله‌دن ، قویدو زبان‌بسته منی
غصه و غم یئماقا ائیله‌دی سردسته منی
دائما قویدو پریشان غمیم آتدی خان‌عمی !
بو فشارات و غمه من‌ده داها قالمادی تاب
وضع دوران ائله‌دی قلب‌لری بس‌کی کباب
یاشاماق دنیادا بوندان بویانا اولدوعذاب
وای بیزه ایش‌لریمیز مشکله چاتدی خان‌عمی !
عمردن لذت آپارماق ملته اولدو حرام
وضعه باخدیقجا گلیر سوزشه قلبیم‌ده یارام
چوخ چتین‌دیر منه بو مهلکه‌دن جان قوتارام
بس‌کی غم‌لر منی سولدوردو سارالتدی خان عمی !
روزگاری بئله گؤردوک‌جه منه غم گلیری
بو ایشیق دنیا منیم گؤزلریمه چم گلیری
فشاراتین چوخلوقوندان منه سرسم گلیری
نقشه‌نی وضع زمان گؤر نه یارالتدی خان‌عمی !
هَره بیر یان‌دا پریشان‌دی آچیلمیر داماقی
دائما شام - ناهارا غصه و غم‌دیر یئماقی
کبابا سپماقا گؤرمور قاباقیندا سوماقی
حله گؤز گؤرمیه‌جک! غصه کورالتدی خان‌عمی !
بیر نفر ائوله‌نه بیلمیر قالیب آواره تمام
ایسته‌سه ائوله‌نه ، واجب‌دی ازل سالدیرا دام
بو مخارج‌لره هاردان یار آلار پولسوز آدام
آزجا دِء رستم‌علی جئشنی یوبالتدی خان عمی!
ایسته بنایی ! خدا ایش‌لری آسان ائله‌سین
کرم و فضلینی بو ملته احسان ائله‌سین
بو قارانلیق گئجه‌نی نورو چراغان ائله‌سین
بو یاتان بختی او نور بلکه اویالتدی خان‌عمی !
( خسروشاهین آتا - بابالی اکین بیچیم‌لی صنعت باشینا گتیریلن اویونلار باره‌سینده ) :
آی پیاز
نه‌یه گلدین بو محال‌دا بئله جولانه ، پیاز !؟
شأنینی پخش ائله‌دین بیربئله هریانه ، پیاز !
سن دئدین‌بس قاباق ایل‌لرکی عزیزلیک قالاجاق !؟
احترام‌ایله سنی مشتری فورا آلاجاق !؟
کهنه بورجو بو یازیق برزگارین آزجالاجاق ؟!
گزه‌جک خلقین ایچینده هامی مردانه ، پیاز !
باخما سابق‌ده عزیزلیک سن‌ایله همدم ایدی
پیاز اکمه‌ک او زمان خلقین ایچینده کم ایدی
ایندی هر یانه باخاندا گؤرورم یاش زمی‌دی
بنزه‌دیبسن هامی صحرالاری بستانه ، پیاز !
یاخشی خدمت ائله‌میشدین گئچن ایل برزگارا
گلمه‌ئیب‌دیر او جلال ایندیه‌دک روزگارا
ائله اولموشدون عزیز ، گلمه‌دین اصلا بازارا
سنی صحراده ساتان گئتدی خراسانه ، پیاز !
او زمان آلدیلا تهران‌دا سنی عزت‌ایلن
تاجرین حسابینی وئردیله چوخ حرمت‌ایلن
دئدی‌لر بس قالاجاقسان همه‌شه شوکت‌ایلن
یاخشی وئردین فریبی ملت ایرانه ، پیاز !
گؤردولر وار پیازین یاخشی خریدار - بازاری
گونده بئش- آلتی دیزل ائیلیری تهران گوذاری
هره بیر مقصودایله اولدو پیاز برزگاری
اولدون آخرده بو نوع‌ایله ذلیلانه ، پیاز !
ساتیلیر ایندی بازاردا یوکون اون‌بئش قیرانا
هله ایستیر آلا بعضی‌ده او پول‌دان دالانا
یوک اَنیب آی بالا ! گل سور اولاغی سال دالانا
آلدیقی پول‌دا گئدیب قهوه‌ده قلیانه ، پیاز !
دئمیرم مضطر اولوب وار نئچه خالوار پیازی
هر طلب‌کاری گؤرر گر فروش اولسا بیر آزی
ولی بالمرّه یاتیب ایش‌لمیری داش تارازی
بیر نفر مشتری یوخدور گله میدانه ، پیاز !
ییغیشیب عورت -اوشاق ، قویمادی صحراده سنی
ائله‌دین یاخشی عزیز ملّت ایچینده حسنی
پیاز اکمه‌ک یازیقی ائیله‌دی ثروت‌ده غنی
عالمه بوش‌لو دوشوب ، باخ او پریشانه ، پیاز !
گؤروسن مشتری یوخ، گئت حله انباری‌ده یات
یوخدو سلمانی پولو بوغ ساقالی آزجا اوزالت
بو پریشانلارین آز حوصله‌سین بیر بئله قات
قوی گؤره‌ک ایسته‌یه‌جکلر سنی تهرانه ، پیاز ؟!
گئچن آی رحمان عمی ائیله‌دی تهران سفری
بیر دیزل ووردو پیاز ، بؤيله گلیب‌دیر خبری :
گؤرمه‌ئیب‌دیر کیرانی آلدیقی پول مختصری
اصلی اولسا بو سؤزون ، وای بو سلیمانه ، پیاز !
بوشلامیر شوفر و حمال یاخاسین اؤز چولونو
گؤتوره رحمان عمی جان باسا تهران یولونو
یازیقین اؤيله طلب‌کارلار آلیب ساغ-سولونو
آز قالیر تریاک آتا چون‌کو گلیب جانه ، پیاز !
فکر ائدیر یوخدو پولو خرج ائده گر ساخلاسالار
گاه دئیر اؤز-اؤزونه : "راضی‌یم الله ! آسالار
اکمه‌رم بیرده پیاز گر یاخامی بوشلاسالار
ائویمی ییخدی عجب ائیله‌دی ویرانه ، پیاز "
آی داداش! عبرت‌ایلن باخ بیر او رحمان عمی‌یه
ائله قورخوب‌دو گؤزو ، گلمیری اصلا زمی‌یه
او قده‌ر جانه دویوب ، ایستیر ال آتسین قمی‌یه
قورخورام قاتل اولا آخری رحمانه ، پیاز !
آخ دئین بیرجه گؤروم گندم و جو هاردا قالیب ؟
نه‌یه فکر ائیله‌میسیز بیر بئله گندم آزالیب !
گؤروسن دولتیمیز خارجه‌دن گندم آلیب
یوخسا اولموش‌دو چؤرک بیزلره هر آنه ، پیاز
عزیزیم ! یاده سالین گندم و جو برزگارین
راحت ائیلر بشرین عمر مدام روزگارین
دائما گندم و جو ایستیری اوغلان بو قارین
یئیه‌جکسن دئیرم هر شب و صبحانه ، پیاز ؟!
بوشلا بنائی ! مذمت ائله‌مه چوخ‌دا داخی
بو جماعت پیاز اکمز ، بئله بیلمیردی آخی !
اکسه‌ده کم اکی‌لر ، چوخلاری حتما بوراخی
ملتین گؤردوله باغرین گتیریب قانه ، پیاز
قایناق : خان‌عمی ( کتاب )؛ تلگرام فردای خسروشاه
