خسروشاهلی اعجاز - شعر « آدمیت وقتی‌دیر »
خلقیمیز همّت قېلین ایش وقتی غیرت وقتی‌دیر
قرنیمیز قرن فضادېر علم و صنعت وقتی‌دیر
یاتمایاق آز یوخلایاق علم اؤڲرنه‌ک بیدار اۏلاق
اغتشاشی بۏشلایاق عورت کیشی هشیار اۏلاق
آنلایاق صدق و صداقت صاحب کردار اۏلاق
ظلم و آزار ائتمه‌یه‌ک همیشه خوش رفتار اۏلاق
ایندی دوران سؤیله‌ئیر چون آدمیت وقتی‌دیر
خلقیمیز همّت قېلین ایش‌وقتی غیرت وقتی‌دیر
یوخلاماق ایامی کئچمیش ای وطن اولادېمېز
اللشه‌ک اۏلسون بیزیم‌ده دۆنیادا بیر زادېمېز
آدلاناق هر اؤلکه‌ده اثبات اۏلونسون آدېمېز
اۏلمایاق شیطانه خادم چون گئدر هر زادېمېز
یوردوموز یۆز یۏل گئدیب تالانه خدمت وقتی‌دیر
خلقیمیز همّت قېلین ایش وقتی غیرت وقتی‌دیر
اجنبی خادم‌لرین بدنام ائدین خجلت قېلین
ساتسا هرکیم یوردونو بیگانه‌یه عزلت قېلین
وېرمایېن تهمت آخوندا بو سؤزه دقت قېلین
حق دئین عالم‌لره قیمت وئرین حرمت قېلین
اۏلمایېن غافل امان‌دېر چون که قدرت وقتی‌دیر
خلقیمیز همّت قېلین ایش وقتی غیرت وقتی‌دیر
قۏیمایېن گلسین زغن بایقوش چالاغان گۆلشنه
جهد ائدین بیگانه‌لر ال تاپماسېن بو میهنه
تاپسا ال نابود اۏلار یۏل وئرمه‌ئین اهریمنه
یوردوموز نفرین‌ائدر خلقین باش‌اڲسه دوشمنه
هامی وئرسین ال اله واللهی وحدت وقتی‌دیر
خلقیمیز همّت قېلین ایش وقتی غیرت وقتی‌دیر
بیر باخین هرزگوئینه اۏلدو تالان ثروتی
گئتدی یغمایه بۆتۆن ناموس و عار و عصمتی
قالدی تۏپ‌لار تانک‌لار آلتېندا ایضا ملّتی
اۏلمامېشدی بۏسنیانېن صنعته چون رغبتی
موشکه موشک گرک وېرماق رقابت وقتی‌دیر
خلقیمیز همّت قېلین ایش وقتی غیرت وقتی‌دیر
جنگ‌ده طیّاره موشک دۆشمنی نابود ائدر
دۆش تمدّن فکرینه چۏخ اۏلما جاهل بی‌خبر
دۆشمنه نفرین و قارقېش یا دعا وئرمز ثمر
آز اۏخو امّن یجیبی دور آیاقا خیره سر
تۏغلاما تزویرایله بو خلقی فرصت وقتی‌دیر
خلقیمیز همّت قېلین ایش وقتی غیرت وقتی‌دیر
قۏیما نابود ائیله‌سین بیگانه بو کاشانه‌وی
یاتما دور آباد قېل بو غارت اۏلمېش خانه‌وی
بی‌ریا اۏل قۏی کناره جهلیوی فتّانه‌وی
قایتانېن قېر قۏی داغېلسېن اۏ قارا صد دانه‌وی
بیزده ده اۏلسون شهامت استقامت وقتی‌دیر
خلقیمیز همّت قېلین ایش وقتی غیرت وقتی‌دیر
خاندان پهلوی ایرانی ویران ائیله‌دی
شوکت سامانېنې شیطانه احسان ائیله‌دی
ایسته‌دی هرکیم دینه قانېنا غلطان ائیله‌دی
دین اسلامېن بئلین سېندېردی طغیان ائیله‌دی
بیر امام دینلندی اۏندا سؤیله رحمت وقتی‌دیر
خلقیمیز همّت قېلین ایش وقتی غیرت وقتی‌دیر
تاج و تخت‌دن ال چکین دای دۆشمه‌سین سلطان سؤزۆ
شاه سؤزۆ دربار سؤزۆ هم سلطنت قوربان سؤزۆ
ظالم و خون‌خوار و غدّار بیرده سردار خان سؤزۆ
اۏلماسېن ایرانی‌ده بوندان سۏرا شیطان سؤزۆ
اڲمه‌ئین باش ذلّته ملّت اهانت وقتی‌دیر
خلقیمیز همّت قېلین ایش وقتی غیرت وقتی‌دیر
شعرچون صنعت‌دیر «اعجاز» ! ، ماهر اۏل بوصنعته
چاتدېرار بیرگۆن بو صنعت خلقیوی شخصیته
تاپسا رونق اؤلکه‌میز، واللهی اۏخشار جنّته
اهل عرفان ایسته‌مز اؤز یوردو گئتسین غارته
هر زمان سؤیلۆر امان‌دېر علم و صنعت وقتی‌دیر
خلقیمیز همّت قېلین ایش وقتی غیرت وقتی‌دیر.
قایناق : سئیران‌تپه منظومه‌سی - آرتیرمالار ( کتاب ). تلگرام فردای خسروشاه
