« دئدیم - دئدی »

دئدیم : تؤکمه قارا زولفون نیگاریم مه جمال اوستده
دئدی : مستانه‌لر دایم گزر فکر و خیال اوستده

دئدیم : " اللهه خوش گئتمز " منی آغلاتما عشقونده
دئدی : بیجا یئره تؤکمه گؤزون یاشین وصال اوستده

دئدیم : اول خال هندویه اولوب واله جهان اهلی
دئدی : کاتب یازیب قرآن داخی بو خط و خال اوستده

دئدیم : آل عاشقین جانین قوتار جور و فلاکت‌دن
دئدی : عاقل اولان گئچمز جانیندان عیش‌و حال اوستده

دئدیم : مین دفعه جان وئرسم یولوندا ، افتخاریم‌دیر
دئدی : دیوانه‌سن جانین وئریرسن بیر هیلال اوستده

دئدیم : اینجیکلی‌دیر سندن غمینده قان اولان گؤیلوم
دئدی : قان ائیله‌مه کؤنلون عبث بو بدخصال اوستده

دئدیم : ای دلبریم ! بیرجه اومیدیم عزتیم سنسن
دئدی : بیچاره ! چؤل‌لرده دولانما بیر مارال اوستده

دئدیم : بال‌و پری سینمیش قوشا اوخشارتما « اعجاز»ـی
دئدی : « اعجاز»-ده عمرون هدر قیلمیش غزال اوستده

قایناق : سئیران‌تپه منظومه‌سی - آرتیرمالار. یایقالا